Таво, кыдзи и мукöд воясӧ, Слӧбӧда сиктын пасйим зэв колана да пыдди пуктана праздник – олӧма йӧзлы сиӧм Лун. Ми, культура Керкаса уджалысьяс, дасьтiм неыджыд концерт, кöнi петкöдлiсны ассьыныс кужанлуннысö «Парма ёль» да «Волна» клубса коллективъяс. Концерт вылын юргисны мыла, лов кыпöдана сьыланкывъяс. Праздник кежлö бура дасьтысисны и школаса велöдчысьяс: Политова Женя лыддис монолог И. Пивоваровалысь «Суп с котом», Остапов Саша лыддис монолог В. Драгунскийлысь «Кот в сапогах», а медiчöт артист Обрезков Сергей лыддис баб йылысь зэв мыла кывбур. Отсалiс дасьтыны тайö номеръяссö да петкӧдлыны челядьлысь талантъяснысӧ Глотово шöр школаса велöдысь Доронина Маиса Владимировна. Концерт дырйи уна бур кывъясöн чолöмалiс верстьö йöзöс ветеранъяслöн котырса председатель Карпова Галина Алексеевна. Сьӧлӧм вӧрзьӧданаӧн артмис концертыс.
Олöма войтырлы ветеранъяслöн котыр лӧсьӧдiс праздник кежлӧ пызан. Чöсмöдiсны лöсьыд вöлöгаöн, юктöдiсны чайöн, пӧся чолӧмалiсны юбиляръясӧс (тайӧ Калинин В. В., Жилина Л. И., Обрезков В. В., Павлов М. Е., Окулов М. А.), дасьтiсны налы козинъяс. Дыр на юргисны пызан сайын мича сьыланкывъяс. А кутшöм збоя йöктöны миян сиктса верстьö йöз, томъяслöн вежыс петö. Зэв кыпыда коли гажыс!
Ми кöсъям висьтавны ыджыд аттьö культура Керкаса коллективъяслы, школаса велöдысьяслы и челядьлы, кодъяс эз кольччыны бокö и отсалiсны дасьтыны концертсö. Мед жö том поколение некор оз коль веськодьöн пöрысь йöз дорö!

Слöбöдаса культура Керкаын уджалысьяс.