Косланын талун муніс Удораса коми войтырлӧн 27-ӧд конференция, кытчӧ чукӧртчылісны 45 сайӧ морт.

На пӧвстын – сикт-посёлокъясысь делегатъяс да карысь воӧм чина йӧз. Нуӧдіс аддзысьлӧмсӧ районса «Коми войтырлӧн» президиумӧ пырысь, Усогорскса шӧр школаын велӧдысь Галина Лобанова.

Чолӧмаліс удорасаӧс Галина Габушева – Коми Республикаса Правительствоысь веськӧдлысьӧс вежысь, вочавидзис делегатъяслӧн юалӧмъяс вылӧ Олег Хохлов – образование министерствоысь чина морт, мый лои вӧчӧма колян конференциясянь кадколастӧ юӧртіс районса юралысь Николай Жилин.

Тавося конференциялӧн шӧр темаыс – районса школаясын коми кыв велӧдӧм, код серти лыдпасъяс вайӧдіс Елена Осипова, районса образование веськӧдланінӧн юрнуӧдысь. Сы серти, районса став школаын юргӧ коми кыв, а Пыссаын, Черныбын, Важгортын, Ёвкӧджын, Глотовоын, ӧткымын классъяс Косланын да Усогорскын – коми кывсӧ велӧдӧны кыдзи чужан кыв. Кыдзи пуктӧма тайӧ уджсӧ школаясын, висьталісны Анна Кряжевская – Глотово, Галина Лобанова – Усогорск, Мария Осипова – Благоево, Ольга Васильева – Кослан. Кыдзи чужтоны коми кыв да культура дорӧ муслун, сернитiс Косланса детсадысь старшӧй воспитатель Ирина Черногородцева.

Асланыс сёрниын делегатъяс лэптылісны и уна мукӧд юалӧм: школаяс велӧдысьясӧн могмӧдӧм, больничаяс да ФАП-ъяс – медицина уджалысьясӧн, культура керкаяс – специалистъясӧн; туйяс дзоньталӧм, вӧр-ва видзӧм, коми телеканал восьтӧм да мукӧд.

Делегатъяслысь вӧзйӧмъяс лоӧ пыртӧма резолюцияӧ, кодӧс сэсся ыстасны Республикаса Правительствоӧ, Республикаса Юралысьлы, Министерствоясӧ, районса юралысьлы.