Важöнсянь нин комияс пасйывлiсны храмöвöй праздникъяс, быд сиктлöн вöлі аслас гаж, кодi вылi чукöртчывлісны мукöд сиктъясысь олысьяс. Сiдз Йöртымдiн сиктö волывлісны тöвся Öпöнасей вылö, а гожöмын пасйылісны Трöича лун. Коркö вичкоын уджалысьяс на индывлöмны пасйыны тайö лунъяссö. Сідзи öпöнсей лун вичмöма Йöртымдінсаяслы.
Öпöнасей бурдöдöма йöзöс. Кор абу вермöма лечитны найöс, ёна на вöсна кевмысьöма. Öпöнасей вöлöма ыджыд тушаа, ён мортöн, уджалöм бöрас сёйöма куим пöв унджык мукöдысь. Öтчыд сёйигöн Öпöнасей вылö кöритöмöн видзöдöма öти монах. Тайö видзöдласыс Öпöнасейлы абу воöма сьöлöм вылас и вочавидзöма: «Эн кöрит менö! Ме ыджыд и сёя уна сы вöсна, мый Богородица индöм серти меным унатор колö вöчны, пола, мый меным оз тырмы кадыс став бурторсö вöчны йöзыслы».
Öпöнасей лун важöн видзлісны 4 лун (тöвшöр 28-31 лунъясö) Йöртымдiн гöгöрса сиктъясын. Медводз гажöдчылісны Йöртымдiнын, сэсся – Йöвнöрысын, коймöд луннас – Кöрттувъяын и Лязюлын, нёльöднас - Сёрдлаын. Дасьтысьлiсны зэв бура: медводз мичаа мыськавлiсны керка пытшкöс, пулiсны сур, пöжавлiсны пирöг, шаньгаяс да черинянь. Но векжö медшöр могнас вöлöма асланыс рöдвужкöд паныдасьлöм, кодъяс олiсны мукöд ылыс да матыс сиктъясын.
И со 2014 воын урасьöм тöлысь медводдза лунö Культура керкаын öтвылысь лои пасйöма Öпöнасей лун. Йöртымдiнö локтiсны и Солнечнöйысь «Рябинушка» да «Солнышко» котыръяс. Гажа концертлöн кывкöртöдöн лои «Йöртымдiнсаяслöн» петкöдчöм. Найö сьылiсны гажа коми сьыланкывъяс.
Концерт бöрын чöскыд пöжасöн юисны чай да öтвылысь сьöлöм бурмытöдз сьылiсны. Бура жö колис Öпöнасей праздник! Ставлы сьöлöм вылö воис сійö.
Концерт видзöдысьяс пöвстын вöлi уна том йöз. Найö сюся кывзiсны да пель саяныс сюркнялiсны ставсö. Ми кутам лача, мый Öпöнасей лун оз вун да томуловлы кольö вежöрас.

Йöртымдінса культура керкаöн веськöдлысь Т.В.Ярова